Guntra Kuzmina: Nikodema Rancāna bolva ir īdvesma i pamudynuojums dareit dorbus ar vēl leluoku sporu

Guntra Kuzmina -- Rēzeknis nūvoda Nautrānu vydškolys strukturvīneibys Bieržgalis pamatškolys muzykys školuotuoja, jaunūs talantu īdvasmuotuoja, Rēzeknis nūvoda  jaunīšu vokaluos studejis "Skonai" vadeituoja, talanteiga komponiste, kura uzrakstejuse muzyku vairuokom dzīsmem ar latgalīšu dzejnīku Voldemāra Vogula, Inetys Atpilis - Juganis u.c. dzeju. Guntra ir vīna nu tim 9 izcyluokajim Latgolys pedagogim, kas paguojušajā godā izapeļneja žurejis atzineibu i īgiva monsinjora Nikodema Rancāna bolvu -- sudobra pokovsaktu -- gūdpylnajā nominacejā “Par veiksmeiguokū jaunuo pedagoga debeju”.  Ari itūgod Nikodema Rancāna bolvu sajims izcyluokī Latgolys pedagogi. Īpazeistynojūt skaitietuojus ar paguojušuo goda nominantim, uzdevem G. Kuzminai dažus vaicuojumus.
Kū Tev nūzeimeja itei bolva, voi Tu pyrms tam daudz kū zynuoji par N. Rancana personeibu? Voi bolvys sajimšona lyka Tev vairuok pasaintereseitīs par jū? 
Guntra Kuzmina. Muns sapnis jau kūpš bierneibys beja kļyut par škouotuoju. 16 godu vacumā suoku vadeit ansambli, kuru daleibnīcis beja munys muoseicys i muosa. Pamozam man suoka izadūtīs saprast, kū i kai lobuok dareit, suokom giut panuokumus i as saprotu, ka kotram cylvākam ir dorbs, kas jam pazadūdās vyslobuok, i man tys ir sirds dorbs – školuotuoja. Man lūti pateik struoduot lauku školā, kur bārni tevi sagaida sirsneibys i smaida pylni. Itei bolva ir īdvesma i pamudynuojums dareit dorbus ar vēl leluoku sporu.
Asmu daudz lasejusi i dzierdiejusi par Nikodemu Rancānu kai par krītnu i eistynu latgalīti, jo Nikodemam pīmyta ļūti cāla īpašeiba – duosnums, kas ir ļūti napīcīšama arī školuotuoja dorbā. Snīgt zynuošonys, dūt tikai lobuokū. Nikodems Rancāns arī pats asūt dzeivuojs ar vuordim, ka nav leluokys mīlesteibys, kai zīduotīs cytu lobā. Prūtams, ka man, taipot kai monsinjoram Nikodemam Rancānam, ir svāta bazneica i mīrs, kuru tī vīnmār var atrast. Itei bolva nūteikti pamudynuoja na tikai mani, bet arī cytus – pasainteresētīs vairuok par Nikodemu Rancānu.
Arī bārnim školā stuostu par šū izcylū pedagogu i personeibu.
Kū Tu dūmoj par latgaliskuos dzeiviszinis vuiceišonu školā, voi Tu poša tū eistynoj sovā dorbā?
-- Ir jau tai, ka bārni runoj latgaliski na tikai školā. Jī sazarunoj latgaliski, eimūt iz sātu, ar draugim, īeimūt cīma veikalā. Myusu vide ir ļūti latgaliska, i man ruodīs, ka mes nadreikstom pazaudeit latgaliskū arī školuos. Mes ar bārnim vuicamēs dzīsmis latgaliski, spielejom dažaidys spielis par latgalīšu tautysdzīsmu i tradiceju tematiku. Ir školānim juozyna latgalīšu spāka dzīsmis, jo tuos ir dzīsmis, kurys tiks dzīduotys nu paaudzis paaudzī vysod, tuos ir dzīsmis, kuruos ir lels  spāks. Taipot ir arī ar dzeivisziņu, tradicejom, latgalīšu volūdu. Ir juorunoj ar bārnim školuos par tikumiskuom i gareiguom vierteibom. I juoteic, ka bārni vysod izruoda lelu interesi, kod stuostu par kaidom latgaliskuom vierteibom, tradicejom voi personeibom.
Dasaceit školuotuojus Nikodema Rancāna konkursam var da 5. septembra, nūslāguma pasuokums nūtiks 25. septembrī Ludzys Kulturys nomā. Konkursu organizej Latgalīšu Kulturys bīdreiba sadarbeibā ar Rēzeknis Tehnologeju akademeju, Kulturys ministreju, Rēzeknis, Ludzys, Preiļu i Aglyunys nūvoda pošvaļdeibom. Vaira informacejis i konkursa nūlykums ite: http://latgalisubidreiba.mozello.com/nutiksonys-1/bolva/