Literari muzykaluo “Andrejdīna” 20 godu jubileju svieteis Lūznovys muižā

25.11.2019

Kultūra

Sastdiņ, 30. novembrī, iz tradicionalū sasatikšonu Andrejūs aicynoj literari muzykaluo nūtikšona “Andrejdīna”. Itūgod “Andrejdīnys” svieteis 20 godu byušonys jubileju i nūslēgs Lūznovys muižys literarūs sarunu cyklu.
Ituo goda “Andrejdīna” reizē byus ari Lūznovys muižys nūtikšonu cykla “Literārās sarunas Lūznavas muižā” nūslāguma sasatikšona, izvaicojūt literati Ilzi Spergu. Taipat kūpā sabrauks tī, kurī roksta, pasauli i sevi maklādami tekstūs. Naiztryukstūši byus ari muzyka, naiztiks bez klauseituoju leidzdarbeibys i Lūznovys muižys šarma.
Ilze Sperga ir pazeistama ar sovim tekstim i daudzim sabīdryskim projektim. Gruomotu skaiteituoju mīlesteibu izapeļnejuse ar prozys kruojumu “Dzeiveibai” (2014). Tys ir smeļdzeigs, volūdys i styla ziņā gords i latgaliskumā dziļš, tematiski Latgolys kasdīnu caur sirdi i emocejom izlaists gobols. Stuostu varūni i bārni, jaunīši, kas dzeivoj myus apleik. Partū ari suope ir osa i osora patīsa.
Vokora gaitā taipat literari kluotyn byus i sovus spylgtuokūs rudiņa tekstus skaiteis Anna Rancāne, Līvija Liepdruviete, Ineta Atpile-Jugane, Ligija Purinaša, Sandra Ūdre, Meldra Gailāne, Karonhisake, Līga Rundāne, Līga Čevere, Jurs Viļums, Inga Kaļva-Minina, Betija Berga i Jana Skrivļa-Čevere. Kai vysod Andrejdīnys mikrofons ir daīmams sevkuram, kurs gryb i kuram ir, kū pasceit pasauļam. Sovu sokomū muzykā ruodeis bārnu rokgrupa “Žvūrgzdyni”, var cerēt, ka gitara pasaruodeis rūkā ari Guntim Rasimam, kurs ir “Žvūrgzdynu” vadeituojs, i Arņam Slobožaņinam.
Literaturzynuotneica i “Andrejdīnys” reikuotuoja daudzu godu garumā Ilga Šuplinska soka: ““Andrejdīnys” tradiceja pasaruodeja pyrma 20 godu, vaicojūt sovejūs goda tymsuokajā laikā. Kūpā puordzeivuots i izjusts daudzi, kotrā reizē ir koč kas taids, kas naatsakuortoj nivīnā īprīškejā reizē. Tok ailinīki i dzīsminīki ir ituo pasuokuma pamats. Tys roda energetiski lobu tyvyma i spāka sajiutu.”
Sarunu ciklys “Literārās sarunas Lūznavas muižā” Lūznovys mūžā nūteik jau vairuokus godus, aicynojūt skaiteituojus atkluot, cik dažaida ir jaunuokuo literatura, i pīduovojūt īpasazeit ar dažaidim autorim. Itūgod pavasarī varēja sasatikt ar dzejneicu Ivetu Ratinīku, vosorys suokā īpasazeit ar dzejnīku i tulkuotuoju Kārli Vērdiņu, tikū rudinī bārnus muokslys detektivspēlē aizruove Luīze Pastore, bet sova sarunu reize bejuse ari Annys Rancānis, Ingys Ābelis, Andrys Manfeldis i cytu autoru īpazeišonai. Literari muzykaluos “Andrejdīnys” “sāta” Lūznovys muiža byus jau ūtrū reizi, īprīšk ite sasatykom pyrma treju godu.
“Andrejdīnys” sasatikšona byus 30. novembrī 17.00. Īīšona pasuokumā ir bezmoksys, gostūs iz sasatikšonu pi čaja i rudiņa dūmu aicynuots kotrys grybātuojs. Ciklu “Literārās sarunas Lūznavas muižā” atbolsta Vaļsts kulturkapitala fonds i Rēzeknis nūvods.
 Vaira informacejis:
Inga Žirgule
Lūznovys muižys kulturys projektu vadeituoja
29390701, 29473700
inga.zirgule@rezeknesnovads.lv
http://luznavasmuiza.lv
http://facebook.com/luznavasmuiza

Žvūrgzdyni_Foto Latvijas Radio Latgales studija Andrejdina Lūznavas muižā 2016. g.

Click to listen highlighted text!