Nūmetne "Sūpluok" aicynoj iz bārnu i pusaudžu večerinku Rēzeknē

09.08.2018

Izglītība

Nu 6. leidz 17. augustam 32 bārni i pusaudži pamatā nu Rēzeknis i Rēzeknis nūvoda (bet ir ari reidzinīks!) pavadēs kūpā nūmetnē “Sūpluok”. Tei ir pyrmuo radūša, muokslinīcyska i latgaliska nūmetne taida vacuma bārnim. Redzēs, kai izadūs i cik gandareiti par sadarbeibu byus bārni, jūs vacuoki i pedagogi nūmetnis nūslāgumā.
Pīpiļdeita vosorys laika pavadeišona jūprūjom ir problēma tim, kas sevi izteic daudzpuseibā i daudzveideibā. Latgolā pamatā ir sporta nūmetņu izviele. Itamā nūmetnē bārni radynuos sovu i vacuoku izpratni par latgaliskajom tradicejom (Ilga Šuplinska), raudzēs skaistys pīminis lītenis izgatavuot ar nūmetnis vadeituojis Lolitas Kivlenieces-Kuzņecovys atbolstu. Sevi izzynuot i itam pasauļam pīlāguot tai, kab napazustu pats, paleidzēs Līga Rundāne i Evika Muizniece – obom nav sveša dzejis raksteišona, muokslys studējis, Līgai vaira drāmys terapejis, Evikai – kulturys menedžmenta i volūdu saskaris lītuos. Ēriks Zeps nu Rikšim breivajā laikā pīduovuos etnomuzykys pamatus, bet Ingars Gusāns (Sovvaļnīks) – par modernuos muzykys atteisteibu i dīdžeja ampluā runuos.
Pasateicūt Ē.Zepa i I.Gusāna īvirzem 11. augustā kūpā ar vysu Latveju Rēzeknis Tehnologeju akademejā nu 16. leidz 21.00 byus Večerynka bārnim i pusaudžim. Iz tū aicynuots sevkurs riezeknīts voi piļsātys gosts. Deju ritmi byus nu tautiskajim da metaliskajim gobolim.
Bet strāčeiti vieļuok byus ari animacejis filmu prezentacejis, uz kurom aicynuosim skateituojus. Par animacejis salikšanu ryupejās Māris Justs.
Nūmetni organizej Latgalīšu kulturys bīdreiba sadarbeibā ar Rēzeknis Tehnologeju akademeju. Finansiali atbolsta vacuoki i Vaļsts kulturkapitala fonda Latgolys kulturys projekts “Bērnu un pusaudžu dienas nometne “Sūpluok””.
Ilga Šuplinska,
projekta vadeituoja
IMG_6127 (1140 x 760)
kkf logo

Click to listen highlighted text!