Rogovkā nūtiks večerinka „ O’ Bļaka!”
2015. goda 30. majā plkst. 20.00 Nautrānu pogostā, Rogovkas sporta hallē - kulturys nomā nūtiks jau tradicionalais tautys muzikantu festivals" Večerinka O, bļaka!", kurā jims daleibu daudzi Rogovkys i tuoluokys apleicīnis tautys muzikanti i kapelys.
Itam pasuokumam ir sova viesture. Piec Smotra tierga Rogovkā vosorys laikā Rudukūs, dzejnīka Ontona Kūkoja sātā sabrauce gosti, nu kurim izarodieja, ka divi ir azartiski muzikanti - Juoņs Žogots iz akordeona i Ontons Savickis iz garmanis. Jīm spielejūt duetā, puorejī pīsavīnuojās, dzīdūt i sytūt ritmu ar vysdažaiduokīm "instrumentim" -- lizeikom, dakšu butelī, kastruļu vuokim... Lai ritmiskuo grupa byutu nūpītnuoka, tyka pīduovuots izmontuot ari bļaku, pa kuru uzsytūt ar pagali un īvibrejūt, izīt breineiga skaņa! Muziceišona ilga vairuokys stuņdis i sanuoce tik skaļa, ka dzierdeja pat iz Rogovkys kristceļu! A sābru gūvs pat nūzaruove nu važu.
Taida muziceišona pošim īzapatyka, i kotru godu Rudukūs tyka reikuots taids muziceišonys pasuokums, kam Ontons Kūkuojs deve nūsaukumu " O, bļaka!". I sābru gūvs ituo pasuokuma laikā vysod nūzaruove nu važu, lai ari tyka sītys maksimāli tuoli iz ūtru pusi nu Ruduku.
Jau piec Ontona Kūkuoja aizīšonys muyžeibā, ar Nellijis Viļumys iniciativu un pogosta porvaļdis atbolstu itaids pasuokums tyka jau divejis reizis reikuots Nautrānūs, uzaicynojūt tamā muziceit tautys muzikantus, kas notus moš i napazeist, bet balleiti gon var nūspieleit.
Itūgod martā i aprelī Tautys muzikantu bīdreiba, bīdreiba "Rogovkīši" un bīdreiba "Rēzeknes pilsētas teātris-studija "Joriks"" projekta "Kultūras saknes" ītvarūs ir pīsadalejuši praktiskajuos meistardarbneicuos un īpazynuši latgalīšu, pūļu, boltkrīvu i krīvu tradicionaluos kulturys vierteibys Latgolā. 16. majā projektā īsaisteitūs bīdreibu daleibnīki tykuos Rēzeknī pīredzis apmainis seminarā "Pozitīvās pieredzes vakars", kai ari nūtyka tautys muzikys koncerts, kurā pīsadaleja kapela "Salnavas danču muzikanti", tautys muzikanti Irēna Znūteņa un Iveta Dukaļska, krīvu folklorys bārnu i jaunīšu ansamblis "Zdravinka", vokalais ansamblis "Harmonija", boltkrīvu ansamblis "Suzorje", kazaku dzīšmu ansamblis "Lazorevij cvetok" i ukraiņu ansamblis "Vodograj". Tān, 30. majā, plkst. 20.00, Rogovkā nūtiks projekta nūslāguma pasuokums " Večerinka O, bļaka!"
Pyrmajā " O,bļaka!" pasuokumā myusu garmanists Juoņs Myurinīks saceja "Naīšu jau pierkstus deļdēt, ja naduoncuosit!", deļ tam itūreiz tautys muzikantus klausēsimēs večerinkys nūskaņuos, kur var muzikantim ari leidza dzīduot i duoncoit.
Byusit vysi meili gaideiti Rogovkā!
Terēze Kūkoja
Projektu "Kultūras saknes" atbalsta:
Latvijas Republikas Kultūras ministrija, biedrība "Dienvidlatgales NVO atbalsta centrs", Tautas muzikantu biedrība, biedrība "Rēzeknes pilsētas teātris-studija "Joriks"", biedrība "Rogovkīši", Rēzeknes Nacionālo biedrību kultūras nams, Rēzeknes Augstskola.
Afiša