Ūtrais Nikodema Rancāna bolvys konkurss Latgolys izcyluokajim pedagogim

13.04.2016

Izglītība

2015. goda 13. septembrī Rēzeknis Augstškola (tān – Rēzeknis Tehnologeju akademeja) sadarbeibā ar Rēzeknis Latgalīšu kulturys bīdreibu (tān – Latgalīšu kulturys bīdreibu), Kulturys ministreju, Izgleiteibys i zynuotnis ministreju, Dagdys, Rēzeknis, Ludzys i Aglyunys pošvaļdeibom organizēja pyrmuo N. Rancāna konkursa nūslāguma pasuokumu. Tymā pīsadaleja 28 nominanti i 9 īgiva N. Rancāna bolvu.
Itūgod N. Rancāna konkurss izcyluokajim Latgolys regiona pedagogim nūtiks jau ūtrū reizi. Konkursam taipoš kai paguojušajā godā var dasateikt četruos nominacejuos: par īguļdejumu un sasnāgumim latgalīšu volūdys, kulturviesturis un nūvoda vuiceibys īvīsšonā un īdzeivynuošonā školys/augstuokuos izgleiteibys īstuodis vuiceibu/ studeju vidē; par inovacejom izgleiteibys procesā; par myusdīneigu un rodūšu pīeju školānu dorba tykuma audzynuošonai un omotu apvuiceibai; par veiksmeiguokū jaunuo pedagoga debeju (pedagogi, kuru dorba stažs napuorsnādz treis godus). Svareigi, kab dasacejuma anketa paruodeitu, ka pedagoga darbeiba ir bejuse aktiva taišni īprīškejūs 2–3 godūs.
Bolvu – sudobra pokovsaktu – daškir reizi godā, septembrī, sagaidūt katuoļu goreidznīka i pedagoga, Latgolys pyrmuos atmūdys darbinīka, monsiņjora Nikodema Rancāna dzimšonys dīnu. Školuotuoju var vierzēt školys voi školānu (studentu) vadeiba, bīdreiba ci vacuoku padūmis puorstuovi.
Konkursa nūlykums i dasacejuma anketa www.lakuga.lv, www.ru.lv i Latgalīšu kulturys bīdreibys jaunajā sātys lopā: www.latgalisubidreiba.mozello.lv
Školuotuojus konkursam var dasaceit nu 4. apreļa da 5. septembra.
Nanūkavej i pastuosti par sovu lobuokū školuotuoju ari cytim!
Ilga Šuplinska,
konkursa koordinatore
 

Click to listen highlighted text!