"Vuolyudzānim" – pylngadeiba!
Rēzeknī 21. aprelī jau 18. reizi nūtyka skotuvis runys konkurss “Vuolyudzāni” i 18. atkluotuo vaļsts olimpiade latgalīšu rokstu volūdā i kulturviesturē.
Konkursa daleibnīkus sveice Rēzeknis Vaļsts 1. gimnazejis direktors Juoņs Poplavskis (tradicionali vysus godus itī latgalīšu volūdys svātki ir nūtykuši Rēzeknis 1. vydškolys, tān - Rēzeknis Vaļsts 1. gimnazejis telpuos, Rēzeknis nūvoda izgleiteibys puorvaļdis vadeituojs Guntars Skudra, Latgalīšu kulturys bīdreibys vaļdis prīšksādātuoja Līveja Plavinska. Itūgod konkurss īsasuoce ar emocionalu breidi - vysi kluotasūšī ar klusuma breidi pīmineja dzejneicu Paulīni Zalāni-Vallenu, kura teiši 21. aprelī tyka guļdeita Stiernīnis Syla kopsātā. Paulīnis Zalānis dzejūļus laseja Ilga Šuplinska.
Konkursā pīsadaleja 63 "vuolyudzāni" nu 23 izgleiteibys īstuodem. Rēzeknis piļsātu puorstuovēja 3 školys: Rēzeknis Vaļsts 1. gimnazeja, Rēzeknis Katuoļu vydškola i Rēzeknis 5. vydškola, bet Rēzeknis nūvodu tikai 4 školys: Gaigalovys pamatškola, Veremu pamatškola, Drycānu vydškola i Nautrānu vydškola. Konkursa daleibnīkim vajadzēja izavielēt latgalīšu dzejnīku - jubilaru Ontona Slišāna, Madsolys Juoņa i Neikšanīša dorbus voi cytu autoru dzejis i prozys dorbus par temu: dzymtuo volūda, muns nūvods, Tāvu zeme. Konkursu viertēja režisore Māra Zaļaiskalns, dzejneica Anna Rancāne, muzikis i Rēzeknis nūvoda dūmis deputats Guntis Rasims, muziki Jurs Vucāns, Arņs Slobožanins, Andris Slišāns portāla lakuga.lv redaktore Vineta Vilcāne, žurnalisti Renāte Lazdiņa i Tenis Bikovskis, Harijs Bernāns. Interesanti ir tys, ka daudzi daleibnīki konkursā pīsadola goņdreiž kotru godu, izaugdami nu 1. klasis da vydškolys, bet vīns nu pyrmūs godu "vuolyudzānim", Guntis Rasims, tān ir žūrejis lūceklis. Ari daleibnīku sagatavuoteibys leimiņs pa itīm godim ir pazaugstynuojs, par kū lels nūpalns ir školuotuojim.
18. atkluotajā vaļsts olimpiadē latgalīšu rokstu volūdā i kulturviesturē pīsadalēja ostonis izgleiteibys īstuodis: Rēzeknis tehnikums, Rēzeknis Vaļsts 1.gimnazeja, Kruoslovys Vaļsts gimnazeja, Drycānu vydškola, Tiļžys vydškola, Nautrānu vydškola (2 komandys) i Baļtinovys vydškola. Olimpiade šūgod taipat nūtyka 5 kuortuos.
1. kuortā olimpiadis daleibnīki atkluoja sovys latgalīšu rokstu volūdys prasmis, 2. kuortā jīm vajadzēja atbiļdēt iz vaicuojumim par Stefanejis Uļanovskys dorbu “Poļu Inflantijas latvieši”. Lai varātu atbiļdēt iz 3. kuortys vaicuojumim, vydsškolānim, sasagatavojūt olimpiadei, vajadzēja puorsavērt 2017. goda TV raidejumus: “Atklāj Latgali ar Kristapu Rasimu” , “Cytaidi latviskais”, “Sajūti Latgali (2.sezona)”, “Trešā zvaigzne. Sākotne. Personība.”, “Vīnuoti, tok na vīnaidi”. 4. kuortys vaicuojumi beja veļteiti dzejnīkam Ontonam Slišānam, bet 5. kuortā – tradicionalais Latgolys kulturtests par 2017. goda nūtikšonom kulturā.
Olimpiadis aizdavumus sagatavuoja i viertēja profesoris Ilga Šuplinska, Lidija Leikuma i Sandra Ūdre.
Olimpiadi un skotuvis runys konkursu atbaļstēja Rēzeknis nūvoda pošvaļdeiba, Rēzeknis Vaļsts 1. gimnazeja, Rēzeknis Tehnologeju Akademeja, Latgalīšu kulturys bīdreiba, Latvīšu volūdys agentura, žurnals “A12”.
Veronika Dundure
Foto: Imants Slišāns
Fotogalerija
Skotuvis runys konkursa rezultati
Olimpiadis rezultati