Ari itūgod byus dzejnīku saceņseiba latgaliski “Rogovkys dzejis voga”

Sastdiņ, 9. septembrī, Rēzeknis nūvoda Rogovkā tiks turpynuota pārn aizsuoktuo Dzejis dīnu nūtikšona – pyrmuo dzejis slama latgaliski dzejnīku saceņseiba “Rogovkys dzejis voga”. Ari itūgod pasuokumā pīsadaleis latgaliski rokstūši dzejis autori, jūs dzejis skaitejumus papyldynuos muzykalys uzastuošonys, kai ari gaidoma muzykys i laikmeteiguos dejis performaņce ar pārnejuo gods uzvarātuojis – Māreitis Slišānis – dzeju.

Dzejis slams latgaliski “Rogovkys dzejis voga” nūtiks 9. septembrī 19.00 stuņdēs Nautrānu sporta hallē-kulturys nomā Rogovkā. Ituo gods dzejis slamā ari pīsadaleis vysmoz septeni latgaliski rokstūši autori, bet saceņseibys, kas nūtiks trejuos kuortuos, uzvarātuoju nūsaceis žurejis i skateituoju bolsuojums. Pasuokumu vadeis Rēzeknis Tautys teatra akters Juoņs Pampe, bet nūtikšonu papyldynuos grupys “Nakts vīzija”, kurā apsavīnuojuši vokalists Imants Spīčs, basgitarists Ralfs Arbidāns, bundzinīks Jurgis Lipskis i gitarists Kristians Justs, i dzīduotuojis Laurys Svikšys koncertprograma, Ingara i Mareka Gusānu muzykaluo uzastuošona. Eipaši ituo gods slamam teik gataveits puorsteigums – muziki Kristaps Višs, Dana Vasiļjeva i laikmeteiguos dejis doncuotuoja Mafalda Garcia, skaņuos i dejā īdzeivynuos pyrmuo “Rogovkys dzejis voga” slama uzvarātuojis Māreitis Slišānis dzeju.

Dzejis slams Rogovkā pārn tyka aizsuokts ar gribiešonu itaidu dzejis skaiteišonys formu paraudzeit ari latgaliski. Pasuokuma nūsaukumā “Rogovkys dzejis voga” simboliski sasavej septembra pyrmuo daļa, kas laukūs īrosts ir ražys nūvuokšonys, jo eipaši buļbu laseišonys laiks, i dzejis saceņseiba. Leidzeigi kai buļbu vogā, kur zynomu apbreinu izapeļnej dreižuokais i ceņteiguokais laseituojs, ari slamā vys tik kai uzvarātuojs da gola teik tys, kurs ar sovu rodūšū dorbu spiej vysa spylgtuok puorlīcynuot žureju i skateituojus, ir izveiceiguokais vuordu meistars. Ari itūgod dzejis slama uzvarātuojs sajims naudys bolvu, bet uzvariejušī dzejūli tiks publicāti latgalīšu kulturys ziņu portalā lakuga.lv.

Rogovkā īcarātais dzejis slams ir vīna nu septembrī tradicionalūs Dzejis dīnu laika nūtikšonu. Dzejis slams ir dzejis kusteiba, kas Latvejā i pasaulī (storptautyski zynoma kai “Poetry slam”) atdzeivynuojuse interesi par myusu dīnu dzeju. Tuos pamatā ir nūsaceita dzejnīku saceņseiba, kurys laikā autori skaita sovus dorbus skateituoju prīškā, bet žurejis i skateituoju bolsuojumā teik nūskaidruots ituos saceņseibys uzvarātuojs. Pyrmais dzejis slams latgaliski nūtyka pārn i, pasasokūt daleibnīku i skateituoju atsauceibai, sasprīsts dzejnīku saceņseibu Rogovkā turpynuot.

Dzejis slama latgaliski idejis autore, Nautrānu pogosta kulturys pasuokumu organizatore Inga Vigule soka: “Pārnejuo gods īsadreikstiešona beja riskys i izaicynuojums, voi i kai dzejis slamu latgaliski saprass skateituoji, cik labi taidā saceņseibā jussīs poši autori, tok pasuokuma azarts, intriga i ari naīrostuo forma lyka saprast, ka dzeju īrostūs “Dzejis dīnu” laikā mes Rogovkā i Latgolā varim svieteit i itai. Klusuo cereiba, ka pasuokums varātu palikt par tradiceju, niu eistyn īsazeimoj kai padorama līta. Ar napacīteibu poša gaidu, kuru latgaliski rokstūšū autoru itūgod sveiksim kai jau ūtruo latgaliskuo dzejis slama “Rogovkys dzejis voga” uzvarātuoju!”

Latgalīšu dzejis slamu “Rogovkys dzejis voga” reikoj Nautrānu pogosta puorvaļde sadarbeibā ar latgalīšu kulturys kusteibu “Volūda” i latgalīšu kulturys ziņu portalu lakuga.lv. Nūtikšonu atbolsta Rēzeknis nūvoda pošvaļdeiba i Vaļsts kulturkapitala fonda mierkprograma “Latvīšu viesturiskūs zemu atteisteibys programa”. Īeja dzejis slamā “Rogovkys dzejis voga” i ballē, kuru spēlēs grupa “Nakts vīzija”, piec tuo ir bezmoksys.

[{"src":"https:\/\/rezeknesnovads.lv\/wp-content\/uploads\/2023\/08\/Rogovkys-dzejis-voga-2023_bilde.jpg","type":"image","opts":{"text":"","thumb":"https:\/\/rezeknesnovads.lv\/wp-content\/uploads\/2023\/08\/Rogovkys-dzejis-voga-2023_bilde.jpg"}},{"src":"https:\/\/rezeknesnovads.lv\/wp-content\/uploads\/2023\/08\/Rogovkys_dzejis_voga-2022_uzvaratuoja-Marite-Slisane-foto-Amanda-Anusane.jpeg","type":"image","opts":{"text":"","thumb":"https:\/\/rezeknesnovads.lv\/wp-content\/uploads\/2023\/08\/Rogovkys_dzejis_voga-2022_uzvaratuoja-Marite-Slisane-foto-Amanda-Anusane.jpeg"}},{"src":"https:\/\/rezeknesnovads.lv\/wp-content\/uploads\/2023\/08\/Rogovkys_dzejis_voga-2022_vysi-daliniki_foto-Amanda-Anusane.jpeg","type":"image","opts":{"text":"","thumb":"https:\/\/rezeknesnovads.lv\/wp-content\/uploads\/2023\/08\/Rogovkys_dzejis_voga-2022_vysi-daliniki_foto-Amanda-Anusane.jpeg"}}]