Dining-night noodle for the teenager “Suguok” styprynova nationalou
![](https://rezeknesnovads.lv/wp-content/uploads/fly-images/243726/Igora-Plica-foto-921x654.jpg)
Latgalīšu kulturys bīdreiba (LKB) ir pīsadalejuse daudzu kulturys pasuokumu reikuošonā. Itamā godā jau trešū reizi teik reikuota ari nūmetne „Sūpluok”, kurys atškireibys zeime itūreiz beja ukraiņu bārnu i jūs školuotuojis pīsadaleišona. Nūmetnis dalinīki – latvīšu i ukraiņu pusaudži – izdzeivuoja latgaliskuos vierteibys, vaicuoja saskaris punktus ar ukraiņu kulturu, diskutēja par etniskajīm stereotipim i radeja sadzeivis ainenis par jīm, styprynuoja sovys latgalīšu volūdys prasmis i teritorialū i nacionalū pīdereibys apziņu.
Nūmetne nūtyka nu 17. da 24. juļa Riezeknis nūvoda Nautrānu pogosta Rogovkā. Nūmetnis nūdarbeibys nūdrūšynuoja literaturys zynotneica i sabīdryskuo darbineica Ilga Šuplinska, multimuokslineica i školuotuoja Evika Muizniece, Riezeknis Tautys teatra aktrise i školuotuoja Sandra Juste, etnomuzikologs i muzykants Ēriks Zeps, kulturys aktiviste Inga Vigule. Sūpluok ar dalinīkim struoduoja i puordūmuos par Ukrainys vaicuojumim, myužeigom vierteibom dalejuos pedagoge nu Ukrainys Oksana Fartušna i nūmetnis vadeituoja – Lolita Kivleniece-Kuzņecova.
Nūmetnē tyka gaideiti aktivi pusaudži, jū vydā ari ostoni ukraiņu puorstuovi. Vysys dīnys tyka pīpiļdeitys ar radūšumu – izgleituojūši dorbojūtīs, pošim izdūmuot dzīsmi voi puorsoku, anekdotis voi CV formā pastuosteit par nūmetnē nūteikūšū avīzē, dazynuot sova uzvuorda izcelsmi i saprast, cik svareiga lūma ir volūdai. Atsapyušūt kuoju prīcys voi teatra nūdarbeibā, dazynuot vaira par latgalīšu vierteibom i simbolim, veiduot sovu imidžu, izsapynojūt nuokūtnis projektu idejis.
Nūmetnē pusaudži vaira runuoja i dūmuoja par latgaliskū, tuo saikni ar nacionalū i pasauleigū, kur itamā šaļtī tik daudz emocionalu viestejumu, patīsu i vyltus ziņu par karu Ukrainā. Sevkurs nu nūmetnis dalinīkim atbolsta Ukrainys centīņus piec mīra i naatkareibys, saprūt, ka tuos ir aplīcynojamys vierteibys sevkurā valstī.
Seviški spylgtai tradicejis tyka izdzeivuotys danču vokorā i nūslāguma pasuokumā „Tradiceju trase. Putynu meiklis”. Tymā pusaudži sūpluok ar vacuokim piec geografiskajom koordinatem raudzeja atrast nūteiktus objektus Rogovkā i rysynuot dažaidys putynu meiklis, kai ari atguoduot žongliešonu, tautysdzīsmis dzīduošonu voi kaidu piramidu, īsaistūt vysu komandu. Naizpalyka sarunys pi guņskura, kai ari prīca par ekskursiju iz Preiļu pusi, kur varēja dorbuotīs ar muolu, gasteit fotomuzejā pi Igora Pliča, dazynuot par Latgolys karūga i Feimaņu viesturi pi Māra Rumaka.
Vīnai vosorai gona daudz latgalisku īspaidu. Ir cereiba, ka tī tiks lykti lītā školys laikā i nuokūtnis sapynūs.
Nūmetni organizēja Latgalīšu kulturys bīdreiba, finansiali atbaļsteja Riezeknis nūvoda dūme i Latgolys kulturys programa, projekts „Pusaudžu diennakts nometne “Sūpluok”” (līguma nr. LKP 2022/42)” .
Lolita Kivleniece-Kuzņecova, nūmetnis vadeituoja
![](https://rezeknesnovads.lv/wp-content/uploads/2022/08/kkf.png)
![](https://rezeknesnovads.lv/wp-content/uploads/2022/08/reznov.jpg)