Iļžukolnā piec senejūs tradiceju “kristeis” folklorys kūpu i bārnu deju kolektivu

20. septembrī vīnūs dīnā Iļžukolna pogosta tautys nomā nūtiks “Krystobu gūds”, kurā piec senejūs tradiceju tiks dūti vuordi Iļžukolna tautys noma folklorys kūpai i Iļžukolna tautys noma bārnu tautys deju kolektivam.

Iļžukolna pogosta daļa nu centra iz zīmelim ir pārnejuo gods rudinī Latvejis Nacionalajā namaterialuo kulturys montuojuma sarokstā īkļautuos Nautrānu kulturtelpys daļa. Iļžukolna pogostā teik kūptys tradicejis, dorbojās vairuoki amatnīki i tur ryupi par namaterialuo kulturys montuojuma saglobuošonu, atteisteibu i nūdūšonu tuoļuok. Tū paleidz dareit ari Iļžukolna tautys noma amatermuokslys kolektivi.

Iļžukolna tautys noma folklorys kūpa dybynuota 1998. godā. Kūpys repertuarā ir latvīšu tautys senejuos dzeivis gudreibys, mutvuordu dailrade, ticiejumi – vierteibys, kū kūpys dalinīki i vadeituojs Ivans Laurs rauga saglobuot i nūdūt paaudzem iz prīšku.

Tikom Iļžukolna tautys noma bārnu tautys deju kolektivs ir vēļ saleidzynojūši pavysam jauns – dybynuots 2020. godā. Kolektiva vadeituoja Silvija Nakonečnaja rauga bārnim īvuiceit latvīšu tautys deju pamatsūļus, stuojis veiduošonu i drūsmi uzastuot publikys prīškā.

Leidz šam obejim kolektivim nabeja nūsaukumu aba vuorda, deļtuo 20. septembrī pasuokumā “Krystobu gūds” tim byus krystobys.

Kolektivu krystobys nūtiks eistyn latgaliskā stylā – ar kūmom i gostim nu tyvuoku i tuoluoku cīmu, ar krystobu tradiceju izspieliešonu, dzīsmem i daņčim. Pasuokumā pīsadaleis Ambeļu pogosta folklorys kūpa "Speiga", Veremu pogosta tautys noma folklorys kūpa "Vuorpa", Veremu pogosta tautys noma videjuos paaudzis deju kolektivs "Kūzuls" i poši krystomī –  Iļžukolna pogosta tautys noma bārnu tautys deju kolektivs i Iļžukolna pogosta tautys noma folklorys kūpa.

Daleiba pasuokumā ir bez moksys.
Pasuokums nūtiks ar Vaļsts kulturkapitala fonda mierkprogramys "Nacionalajā namaterialuo kulturys montuojuma sarokstā īkļautūs elementu ilgtspiejis i atteisteibys programa” finansialu atbolstu. Projektu "Nautrānu kulturtelpys styprynuošona" realizej bīdreiba "Nautrānu kulturtelpai".

Informaceju sagatavuoja: Inga Vigule, projekta vadeituoja, bīdreiba “Nautrānu kulturtelpai”