Dīnys nūmetne pusaudžim „Sūpluok”
![](https://rezeknesnovads.lv/wp-content/uploads/fly-images/134187/Afisa2-921x654.jpg)
Latgalīšu kulturys bīdreiba (LKB) ir pīsadalejuse daudzu kulturys pasuokumu reikuošonā, tymā skaitā četru pasauļa latgalīšu saītu organiziešonā, atbaļstejuse školuotuoju vosorys kursu-nūmetnis „Vosoruošona” nūrisi, pīsadolūt kai lektori voi pasuokumu dalinīki. Latvejis vaļsts symtgadis godā LKB grib radeit jaunu tradiceju – bārnu i pusaudžu nūmetņu reikuošonu, ar nūmetnis dalinīkim izdzeivojūt latviski latgaliskuos vierteibys, styprynojūt teritorialuos i nacionaluos pīdereibys apziņu.
Nūmetne "Sūpluok" (sens latgalīšu vuords, kas apzeimej jiedzīni "līdzās", "blakus") nūtiks nu 6. leidz 17. augustam (dorba dīnuos pļkst.8.30–16.30) Rēzeknis Tehnologeju akademijis (RTA) telpuos. Nūmetnis vadeituoja – Lolita Kivleniece-Kuzņecova, nūmetnis nūdarbeibys nūdrūšynuos muzykanti Ēriks Zeps i Sovvaļnīks, literāte i dramys terapeite Līga Rundāne, literate i TV žurnāliste Evika Muizniece (Karonhisake), fotografs i dizaina speciālists Māris Justs, latgaliskūs izdavumu i pasuokumu veiduotuoja Ilga Šuplinska.
Nūmetnē teik gaideiti 30 aktivi pusaudži (10–14 godi), kam “acs dag” pošam radeit muzyku voi literaru tekstu, paraudzeit spēlēt kaidu muzykys instrumentu voi izgleituojūšu datorspēli, pošam izdūmuot ari spēli voi puorsoku, atsapyust kuoju prīcys voi folkzumbys nūdarbeibā, dazynuot vaira par latgalīšu vierteibom i symbolim, veiduot sovu imidžu.
Nūmetnē byus vareiba runuot i dūmuot latgaliski i sevkurā cytā volūdā, kurā izateikt ārtuok i radūšuok, byus divi pasuokumi, iz kurim aicynuosim daleibai ari cytus školānus: 11. augustā latgaliskuo „Večerynka” i 17. augustā animacejis filmu/-ys Muna Latveja” prezentaceja. Nui, raudzeisim saprast, kas vajadzeigs, kab kina byutu. Byusim prīceigi, ka bārnu vacuoki atbaļsteis atsevišķus pasuokumus i pīsadaleis kaidā nu publiskajim pasuokumim voi vysmoz nūmetnis nūslāgumā ar latgaliskūs tradiceju improvizacejom Nakts stygā.
Ka gribi īsasaisteit, tod leidz 20. juņam aizpildi anketu pusaudžu nūmetnis „Sūpluok” FB lopā. Esi viereigs: ir nūmetnis leidzmoksuojums.
Nūmetni organizej LKB sadarbeibā ar RTA, nūmetni finansiali atbolsta RTA i Latgolys kulturys programys projekts „Dienas nometne pusaudžiem „Sūpluok””.
Lolita Kivleniece-Kuzņecova
Nūmetnis īvirzis