Folklorys vuokumi Nautrānu kulturtelpā | Lekceja
Folklorys vuokumu kolekcejis Nautrānu pogostā. Digitaluo arhiva garamantas.lv izmontuošonys īspiejis. Lektors Sandis Laime.
Nautrānu kulturtelpys boguoteiba sakņojās vītējuos kūpīnys paražuos, tautysdzīsmēs, ticiejumūs i stuostejumūs, kas sasavejuši ar kristīteibys – katuoliskajom – tradicejom. Itei teritoreja ir vīna nu vysuboguoteiguok dokumentātajom Latgolā folklorys olūtu ziņā – agruokī olūti atsatīc jau iz 19. godsymta ūtrū pusi, bet eipaši intensiva folklorys dokumentiešona bejuse nu 20. godsymta 20. godu. Par folklorys vuokumu kolekcejom Nautrānu pogostā pastuosteis folklorys pietnīks, LFK digitaluo arhiva garamantas.lv vadeituojs Sandis Laime, kai ari aicynojam jimt leidza senejuos kartenis, kuruos ir Nautrānu pogostā asūšuos sātys, īstuodis, nūtikšonys i tt.
Septembra vydā Latvejis Nacionalais kulturys centrys paviesteja, ka Latvejis Nacionalais namaterialuo kulturys montuojuma saroksts itūgod papyldynuots ar sešim jaunim elementim, kurūs vydā ari Nautrānu kulturtelpa. Niu, oktobrī i novembrī, latgalīšu kulturys kusteiba “Volūda”, sasadorbojūt ar Rēzeknis nūvoda Nautrānu kulturys centru, aicynoj iz sešu lekceju cyklu Nautrānu kulturtelpys viesturis i vierteibu izzynuošonai.
Vysys lekceju cykla nūtikšonys ir daīmamys kotram grybātuojam, īīšona bez moksys.
Nūtikšonu cyklu projektā “Nautrānu kulturtelpys styprynuošona” eistynoj latgalīšu kulturys kusteiba “Volūda”, kas ir vīna nu Nautrānu kulturtelpys dasacejuma autoru. Nūtikšonys atbolsta Latvejis Nacionalais kulturys centrys konkursā “Latgolys namaterialuo kulturys montuojuma styprynuošonys i populariziešonys pasuokumu nūdrūšynuošona 2025. godā”, Rēzeknis nūvoda Kulturys i turysma puorvaļde, Nautrānu apvīneibys puorvaļde i Nautrānu kulturys centrys.