Koncerts “Gitara i varganis. Dialogi” Rogovkā
Svātdiņ, 8. septembrī, 13.00 stuņdēs Nautrānu Romys katuoļu bazneicā Rogovkā koncerts “Gitara i varganis. Dialogi”, kurā pīsadaleis varganiste Ilona Birģele i gitarists Armands Alksnis.
Nautrānu Vyssvātuokuos Jaunovys Marijis Bezvaineiguos ījimšonys Romys katuoļu bazneicys varganis ir vīnys nu leluokajom i lobuok skanūšajom Herberta Kolbis varganem Latvejā, ari pādejuos juo izbyuvātuos varganis, kuruos ībyuvātys 1542 stabulis. Piec restauracejis instruments ir tics pi ūtruos elpys i pylnā mārā ir īspieja baudeit tuo skaniejumu ari koncertūs.
Armands Alksnis daudzim zynoms kai nazkodejais grupys “Credo” gitarists, kurs teik skaiteits par vīnu nu Latvejis lobuokajim sova omota bruolim. Sūpluok gitarys spēlei jis ir ari dzīšmu i instrumentalūs skaņdorbu autors, ko varēs dzierdēt ari koncertā.
Ilona Birģele piec Juoņa Ivanova Rēzeknis muzykys koledžys absolviešonys klavīru specialitatē i fakultativi – vargaņu spēlē – studēja Latvejis Muzykys akademejā Ligitys Sneibis vargaņu klasē, bet magistra grādu dabuoja prof. Tālivalža Dekšņa vargaņu klasē. Dzymuse i auguse Varakļuonūs, bet ar dzymtys saknem Nautrānu pusē.
2017. godā, nūviertejūt obeju instrumentu saskaņu, Armands Alksnis kūpā ar varganisti Ilonu Birģeli izveiduoja duetu i aizsuoce koncertdarbeibu.
Vargaņu i elektriskuos gitarys apvīnuojums duetā ir na viņ Latvejā, bet ari Eiropā novatorisks izaicynuojums, kas ļaun paruodeit i obeju instrumentu vareneibu i spāku, i intimitati i maigumu, kai ari spieju veiduot dialogu. Duets akademiskuos muzykys laukā ir sajiems atzineigu viertiejumu par originalitati, profesionalu i muokslinīcysku snāgumu nu Latvejā atzeitu muzykys kritiku.
Koncerts ir īplānuots kai skaista duovona jubilejis godā, kam itūgod Nautrānu Vyssvātuokuos Jaunovys Marijis Bezvaineiguos ījimšonys Romys katuoļu bazneicai ir divejis īvārojamys jubilejis – 110 gadu, kai īsvieteits asūšais dīvnoms, i 85 godu jubileja draudzis varganem, kas ir Vaļsts nūzeimis muokslys pīminieklis (Nr.4000). Ari Rogovkai itūgod 225 godu jubileja.
Koncertā videoprojekceju nūdrūsynuos Sergejs Čakāns, tys dūs īspieju klauseituojim na viņ remdētīs muzykys skaņuos, bet ari vāruot i izprast vargaņu mageju i varanumu.
Andra Zubko – Melne
Bīdreibys “Sovim ļaudim” valdis lūcekle
