Nūtiks pyrmais dzejis slams latgaliski “Rogovkys dzejis voga”
![](https://rezeknesnovads.lv/wp-content/uploads/fly-images/245791/Rogovkys-dzejis-voga_FIN-afisa-921x654.jpg)
Sastdiņ, 10. septembrī, Rēzeknis nūvoda Rogovkā nūtiks pyrmais dzejis slams – dzejnīku saceņseiba – latgaliski “Rogovkys dzejis voga”, kurā pīsadaleis latgaliski rokstūši dzejis autori. Pasuokumu vadeis Kozmens, bet nūtikšonu papyldynuos Vinsenta Kūkoja i grupys “Borowa Mc” muzykaluos uzastuošonys.
Rogovkā īcarātais dzejis slams ir vīna nu septembrī tradicionalūs Dzejis dīnu laika nūtikšonu. Dzejis slams ir dzejis kusteiba, kas Latvejā i pasaulī (storptautyski zynoma kai “Poetry slam”) atdzeivynuojuse interesi par myusu dīnu dzeju. Tuos pamatā ir nūsaceita dzejnīku saceņseiba, kurys laikā autori skaita sovus dorbus skateituoju prīškā, bet žurejis i skateituoju bolsuojumā teik nūskaidruots ituos saceņseibys uzvarātuojs.
Pyrmais dzejis slams latgaliski nūtiks 10. septembrī ostoņuos stuņdēs vokora Rēzeknis nūvoda Rogovkā, Nautrānu sporta hallē-kulturys nomā. Tymā pīsadaleis vysmoz septeni latgaliski rokstūši autori, bet slama, kas nūtiks trejuos kuortuos, uzvarātuoju nūsaceis žurejis i skateituoju bolsuojums. Dzejis slama uzvarātuojs sajims naudys bolvu, bet uzvariejušī dzejūli tiks publicāti latgalīšu kulturys ziņu portalā lakuga.lv. Dzejnīku, kuru vuordi tiks atkluoti tyvuok pasuokumam, vydā byus ari dažaidi puorsteigumi – sovu dzejis autora rodūšū pusi vaira paruodeis kaids, kas da ituo zynoms kai prozys raksteituojs, kaidam, kurš da ituo dorbuojīs viņ zam pseidonima, slams byus kai sova veida atsakluošona. Pyrmuos “Rogovkys dzejis vogys” vadeišona uzticāta raidejumu i pasuokumu vadeituojam Kozmenam aba Mārtiņam Kozlovskim. Storp dzejis skaitejumim par muzykalajom uzastuošonom pasaryupēs dzīsminīks Vinsents Kūkojs i grupa “Borowa Mc”. Piec dzejis slama uzvarātuoju nūskaidruošonys pasuokuma apmaklātuoji aicynuoti iz balli, kuru spēlēs Jānis Poplavskis.
Dzejis slama nūsaukumā “Rogovkys dzejis voga” simboliski sasavej septembra pyrmuo daļa, kas laukūs īrosts ir ražys nūvuokšonys, jo eipaši buļbu laseišonys laiks, i dzejis saceņseiba. Leidzeigi kai buļbu vogā, kur zynomu apbreinu izapeļnej dreižuokais i ceņteiguokais laseituojs, ari slamā vys tik kai uzvarātuojs da gola teik tys, kurs ar sovu rodūšū dorbu spiej vysa spylgtuok puorlīcynuot žureju i skateituojus, ir izveiceiguokais vuordu meistars.
Rogovka Latvejis literaturys kartē īsazeimoj kai spylgta literatu dzimšonys vīta – nu iteinīs īt Andryvs Jūrdžs, Ontons Kūkojs, Pīters Miglinīks, Pīters Jurciņš, Anna Rancāne i cyti. Vosorā īrosts ite nūteik literarais konkurss-pasuokums “Pīterdīna Rogovkā”, bet par jauna dzejis pasuokuma Rogovkā rudinī rasšonūs tuo idejis autore, Nautrānu pogosta kulturys pasuokumu organizatore Inga Vigule soka: “Pyrmū reizi par dzejis slama formu izzynuoju na tik seņ, aizstuovūt kvalifikacejis dorbu, ideja īinteresēja i lyka aizadūmuot, deļkam ni latgaliski i ni pi myusu Rogovkā? Tys ir ari veids, kai paruodeit, ka dzeja var byut dažaida, vareiba īpasazeit ar autorim i dzeju dzierdēt nu pyrmolūta jaunā formatā. Autors dzeju pasnādz ar cytu garšu! Tys reizē byutu ari nabejs pasuokums – dzejis slams latgaliski. Latgolā zynomys vairuokys spylgtys ar latgalīšu dzeju saisteitys nūtikšonys – meilys aiļu i dzīšmu festivals “Upītes Uobeļduorzs”, sovulaik “Andrejdīna” – i cīši ceram, ka ari myusu dzejis slams latgaliski varātu tikt par regularu i gaideitu tradiceju!”
Latgalīšu dzejis slamu “Rogovkys dzejis voga” reikoj Nautrānu pogosta puorvaļde sadarbeibā ar bīdreibu “LgSC” i latgalīšu kulturys ziņu portalu lakuga.lv. Nūtikšonu atbolsta Rēzeknis nūvoda pošvaļdeiba. Īeja dzejis slamā “Rogovkys dzejis voga” i ballē piec tuo ir bezmoksys.
Vaira dazynuošonai:
Inga Vigule Nautrānu pogosta kulturys pasuokumu organizatore 28335357 |
Informaceju sagataveja:
Edeite Husare Bīdreiba “LgSC” | latgalīšu kulturys ziņu portals lakuga.lv 29509672 |