Nūtyka “Večerinka” Latgolys nūvodu vydsškolānim
Novembra beiguos Rogovkā, Nautrānu kulturys centrā, nūtyka īpaša "Večerinka" Latgolys nūvodu vydsškolānim ar mierki paplašynuot jaunīšu zynuošonys par Latgolu, popularizēt latgalīšu volūdys praktiskū lītojumu, prūtams, radeit jauku kopā byušonys pīredzi. Pasuokumu organizēja Latgalīšu volūdys puļceņš kūpā ar puorejīm vydsškolānim. Rogovkā īsaroda ostoņu Latgolys izgleitebys īstuožu jaunīši: nu Aglyunys, Baļtinovys, Kuorsovys, Rekovys, Ruguoju, Varakļuonu v-školys, J. Egleiša Preiļu i Kruoslovys Vaļsts gimnazejis. Tuos beja izgleiteibys īstuodis, kuruos ir latgalīšu volūdys puļceni.
"Večerinkā" vaļdeja sirsneiba i jautreiba, kū veicinuoja sasadraudziešona, rūtalis, daņči i dažaidi konkursi, kas beja saisteiti ar Latgolys viesturi, tradicejom i kulturu. Kotram daleibnīkam beja īspieja izapaust, atkluot sovys zynuošonys i pīsadaleit vysuos aktivitatēs.
Īpaši pateikami beja redzēt, kai jaunīši sasadraudzej, īpazeist i izbauda latgaliskuos tradicejis. ''Večerinkā'' jaunīši izjuta kūpeibys sajiutu, īpazyna Rogovku. Pyrmuo gostu nūstuošonys vīta beja cīma centrs, kur 12. klasis školāni Anete, Madara, Līga i Juoņs kūpā ar školuotuoju Viju Miščenko i Ilonu Punāni izruodeja gon leluos rogovys, pastuosteidami, kai radīs Rogovkys nūsaukums, gon vītvuordu karti (taida ir vīneiguo Latgolā), gon apgleznuotuos ar Andryva Jūrdža, Pītera Miglinīka, Ontona Kūkuoja portretim, teicīnim i ar "Smotra" tiergu veikala sīnys, uzsvārdami gon itūs personeibu nūzeimi Latgolys kulturviesturē, gon "Smotra" tierga tradiceju, kas tagad nateik turpynuota. Saistūšs beja stuostejums par bazneicys lelū zvonu Ontonu, kuru 2. pasauļa kara laikā draudze, lai zvons natyktu puorkauseits, nūslēpe Gailumu azarā. Pec kara jis otkon atsagrīze zvanineicā.
Pasuokumu vadeja 12. klasis jaunīši Rūta, Edgars, Renārs i Rolands. Jī laseja Pītera Jurceņa, Ontona Kūkuoja, Annys Rancānis dzeju, veļteitu Rogovkai i volūdai, aicynuoja nūdzīduot Rogovkys himnu – P. Jurceņa “Vuolyudzeiti”. Izgleiteibys īstuožu jaunīši īpazeistynuoja ar sovu školu, dzīduoja, repuoja. Vokora gaitā vysus prīcynuoja atraktivais jaunīšu deju kolektivs “Sprigači”, kū voda Ingūna Ludborža, kura ar Annu Garanču īmuoceja rūtalis i latgaliskūs masu daņčus. Vysim patika Rūtys sagatavuotais latgalīšu dzīšmu konkurss, kurā vajadzēja uzminēt dzīsmi pec zeimejuma, pec pīduovuotajim vuordim. Kur nu vēļ meikļu miniešona, vītu atpazeišona, kas atsarūn attīceiguos školys tyvumā.
12. klasis školāni sajēme i atgrīzeniskū saiti nu gostim: izveiduotuos aptaujis rezultatus, kas līcynuoja, ka "Večerinka" beja izadavusēs, ka itei tradiceja, kū aizsuoka rogovkīši, juoturpynoj. Jī secynuoja, ka ogruok vaira beja taidu pasuokumu i balleišu jaunīšim.
Pasuokums styprynuoja latgaliskū apziņu i radeja sirsneigu i draudzeigu vidi vysim kluotasūšajim. Paļdis vysim, kas organizēja, vysim, kas beja "Večerinkā".
Veronika Dundure, LVLKSA
