P. Jurciņam veļteitajā literatu konkursā itūgod aicynoj īsnēgt dramaturgejis dorbus
Rēzeknis nūvoda Nautrānu apvīneibys puorvaļde i latgalīšu kulturys kusteiba “Volūda” izsludynoj kasgadejū Pīteram Jurciņam veļteitū literatu konkursu. Šūgod kai jaunī, tai pīredzejušī literati aicynuoti īsnēgt da ituo napublicātus dramaturgejis dorbus latgaliski. Konkursam dorbus var īsnēgt da 9. juņa, bet uzvarātuojs kotrā nu treju kategoreju tiks paziņuots tradicionalajā Pīterdīnys pasuokumā Rogovkā 29. junī.
Literarais konkurss, lai gūdynuotu dzejnīka, izcyluo nūvodnīka Pītera Jurciņa pīmiņu, aizasuoce 2005. godā i niu palics par īrostu kulturys nūtikšonu goda sastuovdaļu, Pīterdīnys pasuokumā Rogovkā, izceļūt ari myusu dīnu literatu dorbus. Pīters Jurciņš (1932–2004) beja labi pazeistams kai dzejnīks, tai i jaunūs literatu atbaļsteituojs, bet mozuok zynoms ir fakts par jū kai scenaristu: piec Jurciņa scenareja 1973. godā topuse Reigys kinustudejis dokumentaluo kina “Klātbūtne”.
Nautrānu apvīneibys puorvaļde i latgalīšu kulturys kusteiba “Volūda” da ituo veiksmeigi sasadorbuojuse latgalīšu dzejis slama “Rogovkys dzejis voga” īdzeivynuošonā Dzejis dīnu laikā. Kusteiba “Volūda” 2024. godā ar Vaļsts kulturkapitala fonda atbolstu aizsuoc literaruos jaunradis latgaliski veicynuošonys pasuokumu programu, kurā, ar mierki veicynuot jaunu literarūs dorbu latgaliski radeišonu, paradzāti treis literarī konkursi – P. Jurciņam veļteitais konkurss majā/junī, dzejis slams “Rogovkys dzejis voga” septembrī, kai arī sadarbeibā ar Latvejis Rakstnīku savīneibu i festivalu “Prozas lasījumi” par tradiceju palykušais konkurss “Latgolys prozys skaitejumi” rudinī/zīmā.
“Prozys skaitejumūs viereibys centrā ir prozys dorbi, dzejis slamā – īspieja dzierdēt jaunu dzeju latgaliski, deļtuo, dūmojūt par ituo gods Pīteram Jurciņam veļteitū konkursu, logiski ruodejuos apsavērt vēļ kaidu literarū žanru. Tai, sepinejūt par jaunim dorbim voi vysmoz tūs īcerem dramaturgejā, kurā latgaliski myusu dīnuos nav i cik daudzi raksteituoju, itūgod kūpā ar Nautrānu apvīneibu sasprīdem apvīnuot spākus i motivēt autorus vaira pīsavērst sevkuram nu dramaturgejis žanru,” par P. Jurciņam veļteituo konkursa vierzīni itūgod soka kusteibys “Volūda” vadeituoja Edeite Laime.
Konkursam jaunus, da ituo napublicātus dorbus voi tūs fragmentus kaidā nu treju kategoreju – skečs, bārnu luga voi kaids cyts klasiskuos dramaturgejis žanrys – literati aicynuoti īsyuteit da 9. juņa elektroniski latgalīšu kulturys kusteibai “Volūda” iz e-postu: lgsc@lgsc.lv ar nūruodi “P. Jurciņa konkurss 2024”. Dorbus vērtēs vysmoz treis ar atteiceigū žanru saisteiti eksperti, bet uzvarātuojs kotrā nu kategoreju tiks paziņuots Pīterdīnys pasuokumā Rogovkā 29. junī. Lobuokūs dorbu autori kotrys sajims premejis 100,00 eiro apmārā nu Nautrānu apvīneibys puorvaļdis, kai ari atleidzeibu par dorba (voi tuo fragmenta) publikaceju nu latgalīšu kulturys ziņu portala lakuga.lv 300,00 eiro apmārā.
Ar pylnu Pīteram Jurciņam veļteituo literatu konkursa nūlykumu var īpasazeit Rēzeknis nūvoda sātyslopā rezeknesnovads.lv i latgalīšu kulturys ziņu portalā lakuga.lv.
Vaira dazynuošonai:
Inga Vigule
Nautrānu apvīneibys puorvaļdis kulturys pasuokumu organizatore
viguleinga@gmail.com 28335357
