Pīterdīna Rogovkā 2022
Rogovkā ir tradiceja 29. junī svinēt Pīterdīnu, kod nautrānīši gūdynoj dzejnīku Pīteru Jurceņu i vysus pogosta Pīterus. Ir bejuši koncerti, vakariešona pi guņskura, pogostu amatermuokslys kolektivu uzastuošonuos i citys aktivitatis, bet namaineigs ir pīminis breids Desetnīku kopūs pi dzejnīka atdusys vītys. 2020. godā Pīterdīnu Rogovkā fiļmieja LTV1 raidejums “Cytaidi latviskais”, bet paguojušajā godā pasuokuma nūrise tyka raideita tīšraidī nu Rogovkys cīma centra.
Itūgod Pīterdīna tiks atzeimuota eipaši, jo dzejnīkam Pīteram Jurceņam itys byutu 90 godu jubilejis gods. Dzīsmis ar Pītera Jurceņa vuordim speciali izveiduotā koncertprogrammā dzīduos veiru kuors “Graidi”. Koncertprogrammu veidoj kuora dirigents Juoņs Mežinskis.
Koncerta laikā nūtiks ari tradicionaluo literatu konkursa nūslāgums. Itūgod konkursa moto ir Pītera Jurceņa vuordi: “Var tymsā pakrist redzeigais, bet naredzeigais – gaismā puortapt.” Konkursa dorbu īsniegšonys laiks ir leidz 22. juņam. Kotrys nominacejis laureats sajims naudys premeju 100 (vīns symts) EUR apmārā, kai arī byus specbolva nu Latgalīšu volūdys, literaturys i kulturviesturis školuotuoju asociacejis (LVLKŠA) par bārnu prozu latgalīšu volūdā.
Pasuokums nūtiks 29. junī:
17:30 – pīminis breids Desetnīku kopūs;
19:00 – “Pīterdīna Rogovkā” – koncerts pi Nautrānu sporta hallis – kulturys noma. Literatu konkursa nūslāgums i laureatu apbolvuošona, Pīteru gūdynuošona. Napīmāruotu laikapstuokļu gadejumā pasuokums nūtiks īkštelpuos.
“Pīterdīna Rogovkā” nūteik ar Vaļsts kulturkapitala fonda un A/S "Latvijas valsts meži" Latgolys kulturys programmys finansialu atbolstu.
Inga Vigule,
Nautrānu pogosta kulturys pasuokumu organizatore
