Pīterdīna Rogovkā nūsvynāta!
Jau 18 godu Rogovkā svinēja Pīterdīnu, kas veļteita dzejnīka i publicista Pītera Jurceņa pīmiņai. Itūgod dzejnīkam palyktu 90 godu. Desetnīku kopūs ar sirsneigom dzejis ryndom i breineigom dzīsmem Nautrānu vydsškolys školuotuoji Nellija Žogota, Irena Rancāne i Ivars Rjabovskis gūdynuoja dzejnīka pīmiņu.
Pīterdīnys turpynuojumā nūtyka koncerts Nautrānu sporta hallē – kulturys nomā, kurā pīsadaleja Sovvalnīks i veiru kuors “Graidi” (dirigents Juoņs Mežinskis un Edgars Kuorklinīks), i Literatu konkursa laureatu apbolvuošona.
Tradicionali jau apreļa suokumā tyka izsludynuots Literatu konkurss, veļteits P. Jurceņa pīminai, daleibnīki varēja īsyuteit dorbus pīcuos nominacejuos: dzeja, proza, skečs voi vīncielīņs, bārnu literatura i latgaliskūs vierteibu paruodeišona sevkura dailliteraturys žanra dorbā. Konkursa moto itūgod beja Pītera Jurceņa vuordi "Var tymsā pakrist redzeigais, bet naredzeigais – gaismā puortapt".
Konkursā pīsadaleja 13 autori ar 14 dorbim, kuri atbylda četrom nominacejom. Dorbi dramaturgejā, dīmžāl, pādejūs godūs nateik īsnāgti. Viertiešonys komiseja aicynuoja nuokamajūs godūs raksteit skečus, taipat losamvīlu pusaudžim i jaunīšim. Konkursa viertiešonys komisejis sastuovā itūgod beja:
Veronika Dundure – Latgalīšu volūdys, literaturys un kulturviesturis školuotuoju asociacejis (LVLKŠA) vadeituoja, Nautrānu vydsškolys latvīšu volūdys školuotuoja, Atzineibas krysta komanders /2020/,
Ilga Šuplinska - literaturzynuotneica, sabīdriskuo darbineica i politike,
Anna Rancāne – dzejneica, žurnaliste, dramaturge.
Viertiešonys komisejai konkursa dorbi tyka dūti ar kuortys numerim. Tik piec tuo, kod tī beja izviertieti i nūskaidruoti nominaceju laureati, tyka atkluoti autori.
Konkursa laureatim duovonys sagatavuoja Rēzeknis nūvoda Nautrānu pogosta puorvaļde, bet specbolvu bārnu literaturā – LVLKŠA.
- Nominaceja “Bārnu literatura”: Aelitai Andrejevai, suokumškolys školuotuojai – naudys bolva 100 EUR
- Nominaceja “Proza”: Klaudijai Dembovskai, Rēzeknis Katuoļu vydsškolys 11. klasis škoļneicai – naudys bolva 100 EUR
- Nominaceja “Latgaliskuos vierteibys”: Aelitai Andrejevai – naudys bolva 100 EUR
- Atzineiba nominacejā “Dzeja”: Ilzei Vovkai, Aulejas TN kulturys pasuokumu organizatorei - naudys bolva 50 EUR
- Atzineiba nominacejā “Dzeja”: Brigitai Birkovai, pylna laika studentei Vidzemis Augstškolā, komunikaceju i sabīdriskū attīceibu jūmā – naudys bolva 50 EUR
Specbolvu nu LVLKŠA par bārnu prozu latgalīšu volūdā īgiva Aelita Andrejeva par stuostu “Luoču zemneicu mads”.
Veicynuošonas bolva tyka pasnāgta arī Rykovys Jaunūs literatu kūpai “Dzejis garša” (školuotuoja Iveta Dimzule). Jī beja jaunuokī konkursa daleibnīki (9 leidz 16 godi). Kotrs daleibnīks sajēme duovonenis, bet Jaunūs literatu kūpa – duovonu karti 100 EUR vierteibā veikalā “Liesma” nu Nautrānu pogosta puorvaļdis
Veiru kuors “Graidi” beja sagatavuojs plašu koncertprogrammu: latgalīšu autoru dzīsmis, tautys dzīsmis, Pītera Jurcena dzeju, kū laseja Oskars Lustiks. Kuors i skateituoji sasadzīduoja Latgolai i Nautrānim tik ļūti nuzeimeiguos dzīsmēs – "Pīmiņ, bruoļ", “Skaidruo volūda” i “Vuolyudzeite”. Sovvaļnīka i Mareka Gusāna repertuarā beja daudzi dzīšmu ar Pītera Jurceņa vuordim.
Paļdis sevkuram par pīsadaleišonu, sūpluok byušonu, atbolstu i dareišonu!!!
Paļdis SIA “Latvijas Valsts meži” i Vaļsts kulturkapitala fonda Latgolys kulturys programmai par finansialu atbolstu!
Pīterdīna ir nūsvynāta! Iz sasatykšonu nuokamajā godā!
Inga Vigule, Nautrānu pogosta kulturys organizatore
Foto: Arvīds Gļauda
