Rogovkā izskaņ Pīterdīna
![](https://rezeknesnovads.lv/wp-content/uploads/fly-images/211731/DSC_0601-scaled-921x654.jpg)
Jau sešpadsmytū godu piec kuortys 29. junī Rogovkā teik svynāta Pīterdīna, lai gūdynuotu Pītera Jurciņa pīmiņu i sumynuotu Pīterus.
Itūgod jau maja suokumā tyka izsludynuots Jaunūs literatu konkurss ar devīzi “Tu tymsumam par speiti, nes sovu gaismekleiti”, veļteits P. Jurciņa pīmiņai. Dorbi tyka vārtāti pīcuos nominacejuos: dzeja, proza, skečs voi vīncielīņs, bārnu literatura i latgaliskūs vierteibu paruodeišona sevkura dailliteraturys žanra dorbā. Konkursa dorbu vierteišonys komisejā itūgod beja Anna Rancāne, Veronika Dundure i Ilga Šuplinska. Stuostūt par konkursantu dorbim, Ilga Šuplinska atzeimoj, ka itūgod puorsteidze proza, lai arī juos nabeja daudz. Stuosti paruodeja na tikai raksteituoja dziļū volūdys izjiutu, bet ari tū, ka vierteibu pasauļs, nasaverūt iz attuolynuotū muoceibu procesu, nasaverūt iz COVID laiku un tehnologeju breinumim, nasamaina. Taipat ari Ilga uzsver: “Vīna nu pīvīnuotajuom vierteibom itam konkursam ir tei, ka daudzi, piečuok jau Latvejis i Latgolys literarajai telpai byutiski autori, ir startejuši ar itū konkursu. Radzūt, kai jaunī aug, saprūti, ka ir īspieja na tikai volūdai, na tikai personeibys izaugsmei, bet arī jaunom literatu paaudzem. ”
Konkursa nūslāgums nūtyka 29. junī Rogovkys centrā, kur tyka filmāts koncerts. Iz tū kluotīnī tyka aicynuoti vysi konkursa daleibnīki, lai sajimtu bolvys i pateiceibys duovonys, kuruos saryupēja Rēzeknis nūvoda pošvaļdeiba i Nautrānu pogosta puorvaļde.
Bolvys nu Nautrānu pogosta puorvaļdis 100,- EUR apmārā sajēme:
- Nominacejā “Dzeja” – Inga Kaļva – Miņina.
- Nominacejā “Proza” – Klaudija Dembovska.
- Nominacejā “Bārnu literatura” – Irēna Batare.
- Nominacejā “Latgaliskuos vierteibys” – Sofija Teicane.
- Nominacejā“Dzeja” tyka pīškierta atzineibys bolva Marutai Avramčenko –50,- EUR.
Specbolvys par bārnu literaturu nu Latgalīšu volūdys, literaturys i kulturviesturis školuotuoju asociacejis (LVLKŠA) sajēme Klaudija Dembovska i Irēna Batare.
Koncertā ar muzikalym sveicīnim pīsadalejuos Arņs Slobožanins, Sovvaļnīks i grupa “PusKapļi”, kam itei uzastuošona beja debeja. Koncertā skanēja treis pyrmatskaņuojumi. Sovvaļnīks speciali “Pīterdīnai Rogovkā” ir saceriejs divys jaunys dzīsmis ar P. Jurciņa vuordim: “Latgalīša spāks” i “Ar Reigys morāli”. Sovukuort grupa “PusKapļi” atskaņuoja jaunu dzīsmi ar P. Jurciņa vuordim i Arņa Slobožanina melodeju – “Viedzeļu kadriļa”.
Koncertā nūsarysynuoja vēļ vīns Nautrānu pogostam svareigs nūtykums – J. Soikāna Ludzys muokslys školys Nautrānu filialis izlaidums. Itūgod muokslys školys direktore Sandra Vorkale pasniedze diplomus ostonim absolventim. Leidz ar tū Nautrānu pogosts ir par ostonim jaunīm muokslinīkim bogotuoks. Lai jīm daudzi jaunu, radūšu izadūšonu!
Pasuokums nūtika ar SIA “Latvijas Valsts meži” i Vaļsts kulturkapitala fonda 2021. gods Latgolys kulturys programys finansialu atbolstu.
Iz sasatikšonu nuokušgod “Pīterdīnā Rogovkā”, kod byus Pītera Jurciņa 90 godu jubilejis svineibys, cerams, ka kluotīnī i kuplā pulkā!
Nautrānu sporta hallis – KN vadeituoja Inga Vigule
Foto: Dina Sjomkāne