Atkluoj sovu dzymtys stuostu dīnnakts nūmetnē “Sūpluok”
Jau catūrtū reizi Latgalīšu kulturys bīdreiba (LKB), pasateicūt Eiropys Savīneibys atbolstam, organizej dīnnakts nūmetni “Sūpluok” (daleibnīku vacums 14–18 godi).
Nūmetne nūtiks nu 7. da 13. augusta Rēzeknis nūvoda Rogovkā.
Pusaudžu i jaunīšu nūmetne “Sūpluok” ir veiduota ar mierki izdzeivuot latgaliskuos tradicejis, kasdīnā lītojūt latgalīšu volūdu i veidojūt myusu dīnu jaunīša stuostu par Latgolu.
Leidziegi kai cytus godus izgleitojūšuos nūdarbeibuos (sarunys, improvizacejis, spēlis, mikro lauka piedejumi, radūšuos i aktivuos atpyutys darbneicys) runuosim par Latgolys viesturis pagrīzīņa punktim, kūpsim sovu ideņtitati, vaicuosim sovys saknis, konstruejūt dzymtys stuostu car vysaidom volūdom, augim, kulinarejis tradicejom, senejom kaitom i daņčim, etniskajim prīškmatim.
Nūmetnis gaitā izveiduosim sevkura daleibnīka dzymtys stuostu, īspiejams, nadaudz atškireigā formā, kai par tū īrosts dūmuot. Tūs vysus apvīnuosim ceļojušā izstuodē i daleisimēs ar sovu pīredzi ar sovim vīnaudžim.
Kai sevkuru reizi gaideisim gostūs ari saimis puorstuovus i cytus gostus gon daleibai jau īrostajā intelektuālajā orientiešonuos spēlē, gon meistarklasēs, nūdūdūt nūmetnis laikā īvuiceituos prasmis vacuokim.
Itū reizi nūmetnis daleibnīkim byus vareiba pīsadaleit ari Andrejdīnys literāri muzykalajā pasuokumā Lūznovā 30. novembrī.
Kab pīsadaleitu nūmetnē ir napīcīšams izstruoduot nalelu pīteikuma (konkursa) dorbu. Nūsacejumi ir divi: 1) juoizveidoj radūšs dorbs “Munys saimis (dzymtys) vizitkarte”,2) juoizavielej izpiļdejuma tehnika: zeimejums, kolāža, fotografeja, plakats, instalaceja i tt.).
Dorbu (ci tuo fotografeju) juoīsyuta da 15. juņam iz e-postu: supluok@gmail.com
Pylns nūsacejumu aproksts ITE
Nūmetnis organiziešonu finansiali atbolsta projekts “Dzymtu stuosti multikulturalajā Latgolā i latgalīšu volūdā”, Nr. LV022023, grants “Mozuokumtauteibys, atbiļdeiba, tīseibys, naatkareiba, organizatoryskuo atteiseiba” ES programā “Pilsūni, vīnleidzeiba, tīseibys i vierteibys” (2021–2027).
