Izsludynuots jaunūs literatu konkurss
Rēzeknes nūvoda Nautrānu pogosta puorvaļde izsludynoj Jaunūs literatu konkursu, lai gūdynuotu izcyluo nūvodnīka, dzejnīka Pītera Jurciņa pīmiņu i atjaunuotu jau 2005. godā aizsuoktū konkursa tradiceju.
Pyrmuo Pīterdīna Rogovkā nūtyka 2004. goda 29. junī, sasadorbojūt ar Lauku biblioteku atbolsta fondu i kinorežisoru Juoni Streiču, i aptvēre na tikai Latgolu, bet arī cytus Latvejis nūvodus. Tī beja svātki, kurūs ar dzejis lasejumim pīsadaleja īvārojami latvīšu dzejnīki.
Jaunūs literatu konkurss suocēs nu 2005.g., lai veicynuotu dzejis i prozys atteisteibu (īpaši latgalīšu volūdā). Tymā ir pīsadalejuši 39 jaunī literati nu 7 Latvejis nūvodim, nu tīm 17 dzejnīki. Jaunuokajam konkursantam beja 11 godi. Puors godus konkurss nabeja nūtics.
Itūgod konkursa moto ir Pītera Jurciņa vuordi:
“Tu tymsumam par speiti nes sovu gaismekleiti.”
Konkursā var pīsadaleit kotrys, kurs ir pīrakstejs nūlykumam atbylstūšu, vēļ napublicātu dorbu latgalīšu volūdā. Dorbi tiks vierteiti pīcuos nominacejuos: dzeja, proza, skečs voi vīncielīņs, bārnu literatura i latgaliskūs vierteibu atkluošona sevkura dailliteraturys žanra dorbā. Konkursam dorbi juoatsyuta leidz 31. majam (īskaitūt) pa postu (“Pagastmāja”, Rogovka, Nautrēnu pagasts, Rēzeknes novads, LV-4652, ar nūruodi “Jaunūs literatu konkursam”) voi elektroniski (iz e-postu: inga.vigule@rezeknesnovads.lv), nūruodūt autora vuordu, uzvuordu, telefona numeri, adresu, nūsadorbuošonu.
Konkursa laureatu apbolvuošona nūtiks 2021. goda 29. juņa pasuokumā “Pīterdīna Rogovkā” Rēzeknis nūvoda Nautrānu pogostā. Kotrys nominacejis laureats sajims naudys premeju 100 (vīns symts) EUR apmārā, kai arī byus specbolva nu LVLKŠA par bārnu prozu latgalīšu volūdā.
Seikuoka informaceja nūlykumā.
Inga Vigule, Nautrānu sporta hallis - KN vadeituoja
