Literatu konkurss. Veļteits P. Jurceņa pīmiņai
Nautrānu apvīneibys puorvaļde izsludynoj Literatu konkursu, lai gūdynuotu izcyluo nūvodnīka, dzejnīka Pītera Jurceņa pīmiņu i turpynuotu jau 2005.godā aizsuoktū konkursa tradiceju.
Pyrmuo Pīterdīna Rogovkā nūtyka 2004. goda 29. junī, sasadorbojūt ar Lauku biblioteku atbolsta fondu i kinorežisoru Juoni Streiču, i aptvēre na tikai Latgolu, bet arī cytus Latvejis nūvodus. Tī beja svātki, kurūs ar dzejis lasejumim pīsadaleja īvārojami latvīšu dzejnīki.
Itūgod konkursa moto ir Pītera Jurceņa vuordi:
"Kotrai laimeigai dīnai gon jau ir kaids aizkura dedziejs."
Konkursā var pīsadaleit kotrys, kurs ir pīrakstejs nūlykumam atbylstūšu, vēļ napublicātu dorbu latgalīšu volūdā. Dorbi tiks vierteiti pīcuos nominacejuos: dzeja, proza, skečs voi vīncielīņs, bārnu literatura i latgaliskūs vierteibu paruodeišona sevkura dailliteraturys žanra dorbā. Konkursam dorbi juoatsyuta leidz 22. juņam (īskaitūt) pa postu (“Pagastmāja”, Rogovka, Nautrēnu pagasts, Rēzeknes novads, LV-4652, ar nūruodi “Literatu konkursam”) voi elektroniski (iz e-postu: inga.vigule@rezeknesnovads.lv ), nūruodūt autora vuordu, uzvuordu, telefona numeri, adresu, nūsadorbuošonu.
Konkursa laureatu apbolvuošona nūtiks 2023. goda 29. juņa pasuokumā “Pīterdīna Rogovkā” Rēzeknis nūvoda Nautrānu pogostā. Kotrys nominacejis laureats sajims naudys premeju 100 (vīns symts) EUR apmārā, kai arī byus specbolva nu LVLKŠA par bārnu prozu latgalīšu volūdā.
Seikuoka informaceja nūlykumā, kuru var atrast Rēzeknis nūvoda muojislopā www.rezeknesnovads.lv
Inga Vigule,
Nautrānu apvīneibys kulturys pasuokumu organizatoru vadeituoja
