Nikodema Rancāna konkursa nūslāgums byus Bolvūs

19.09.2022

Izglītība
N. Rancana bolva - sudobra sakta (autors Rihards Ciblis)

Nikodema Rancāna konkursam ir dasaceiti 14 pretendenti nu Rēzeknis piļsātys i nūvoda, Bolvu, Kruoslovys nūvoda i Daugovpiļs. Nūslāguma pasuokums nūtiks 25. septembrī Bolvu Kulturys i atpyutys centrā, īsuocūt Školuotuoju dīnys svineibys i gūdynojūt vīnu nu izcyluokūs Latgolys školuotuoju - monsinjoru N. Rancānu.

Rancāna bolvai ir dasaceiti 14 pretendenti nu pīcu Latgolys pošvaļdeibu. Juosoka, pretendenti puorstuov divys pamata nominacejis: par īguļdejumu un sasnāgumim latgalīšu volūdys, kulturviesturis un nūvoda vuiceibys īvīsšonā un īdzeivynuošonā školā i par radūšu i psihologiski atbolstūšu pīeju muoceibu ci studeju vidē. Nasaverūt iz tū, ka ūtrymā nominacejā tyka aicynuots dasaceit izgleiteibys īstuožu vadeituojus, tymā ir daudz radūšu i sirdsgudru pedagogu, kas struodoj bārnim par prīcu, sova aicynuojuma vadeiti. Tymā pošā laikā divejuos nominacejuos nav dasaceiti školuotuoji, taidā veidā paruodūt, ka pyrmsškolā i augstuokajā izgleiteibā latgalīšu volūdys, literaturys i kulturviesturis vaicuojumi prosa spieceiguoku viereibu i finansējumu.

Nūslāguma pasuokums nūtiks 25. septembrī 14.00 stuņdēs Bolvu Kulturys i atpyutys centrā. Iz pasuokumu gaideiti kai pretendentu izvierzietuoji, tai jūs atbaļsteituoji, poši konkursa daleibnīki, kai ari īprīškejūs godu nominanti i sadarbeibys partneri. Bolvenīšim tei ir loba īspieja pīsadaleit pasuokumā i paruodeit sovys kulturys boguoteibys. Nominantu sveikšonu kuplynuos muzykali puorsteigumi nu folklorys kūpys “Egle” (Rekova, vad. Ināra Sokirka), Bolvu muzykys školys vokalais ansambļs i solisti, Dāvis Lāpāns (Bolvi) i Kate i Domeniks Slišāni (Upīte).

Pasuokumā tiks attaiseitys ari divejis jaunys gruomotys - Anneles Slišānes “Tuoroga stuosti” i  "Jura Gaigala varavīksne" (redaktore Skaidrīte Svikša). Obeju gruomotu autoris ir ari školuotuojis i ir pīkrytušys, ka gruomotys duovynuos konkursa daleibnīkim. Naizpaliks ari sirsneigys sarunys i otkon redziešonuos prīca pi čaja.

Konkursu organizej Latgalīšu kulturys bīdreiba sadarbeibā ar Latgolys Planavuošonys regionu i Bolvu nūvoda pošvaļdeibu. N. Rancana konkurss ir breineiga īspieja izceļt i gūdynuot lobuokūs nūzaris pedagogus, ceļūt školuotuoja profesejis prestižu sabīdreibā i atguodynojūt, cik svareiga lūma puormaiņu procesā ir izgleiteibai.

Konkursu finansiali atbolsta Latgolys Planavuošonys regions, Bolvu nūvoda pošvaļdeiba, z/s “Kotiņi”, Latgolys Etnografiskuo viestnīceiba, informativi – “Vietējā Latgales Avīze”, Latgalīšu kulturys ziņu portals lakuga.lv, Latvejis Radio Latgolys studeja.

 

Ilga Šuplinska, LKB vadeituoja

ilga.suplinska@gmail.com

Click to listen highlighted text!