Pastaigu styga “Gaisma stypram goram” Rogovkā
Nautrānu vydsškolys bārzu bierzs i sporta laukums 11. febraļa vokorā laistejuos dažaiduos kruosuos. Īmasls tam – izveiduotuo pastaigu styga “Gaisma stypram goram”, kas suocēs ar zylūs tūņūs izgaismuotim kūkim pi školys, turpynuojās bārzu bierzī. Boltī bārzi staruoja vysuos varaveiksnis kruosuos. Stygys turpynojumā apmekleituojus gaideja guņskurs. Kod rūkys i daguni beja apsiļdeiti, vysi guoja iz leiklūču stygys turpynuojumu.
Breineigs ceļuojums suocēs futbola laukumā – aiz kotra stygys leikuma gaideja jauns puorsteigums: dekoracejis nu latakom i gaismys bumbeņom, speidūšys lada gleznys, bumbys i svečturi. Savdabeigū ceļuojumu pa leiklūču stygu pavadeja eipašys gaismu dejis. Stygys nūslāgums vede pa lāpu i lada svečturu izgaismuotu aleju. Nūskanis radeišonai skanēja latgalīšu muzyka Sovvaļnīka, Dabasu durovu, Bez PVN, Vinsenta Kūkuoja izpiļdejumā i Annys Rancānis skaiteituos dzejis ryndys.
Styga tyka veiduota, lai mes vysi kūpā styprynuotu goru itymā gryutajā laikā, lai nūtycātu tam, ka piec nakts aust reits, i, golvonais, saglobuotu ticeibu i spāku. Kai saceja Vinsents Kūkuojs – boda laikā kripateņa maizis ir svieteiguoka par nūkluotu goldu pi puorticeibys. Beja lela prīca par cylvāku smaidim, par lobim vuordim,
Jau pastaigys nūrises laikā izdūmuojam, ka nakts gaismys stygai juokliust par ikgadeju tradiceju.. Kurs šūgod napaspēja izbaudeit Rogovkys puosoku, tū varēs izdareit nuokamgod!
Sirsneigs paļdis vysim, kas paleidzēja radeit gaismys ceļu i īprīcynuot tūs, kas nanūzabeida nu soltuma i izbaudēja gaismys stygu! Prūtams, stygys staiguotuojim beja juoīvāroj vaļdeibys nūteiktī īrūbežuojumi par puļceišonūs, kas tyka gūdam izdareits.
Nautrānu sporta hallis – KN vadeituoja Inga Vigule
Foto: Sandis Zabiļevskis