Izsludynuots Literatu konkurss, veļteits Pītera Jurceņa 90 godu jubilejai
Nautrānu pogosta puorvaļde izsludynoj Literatu konkursu, lai gūdynuotu izcyluo nūvodnīka, dzejnīka Pītera Jurceņa (Pētera Jurciņa) pīmiņu i turpynuotu jau 2005. godā aizsuoktū konkursa tradiceju.
Pyrmuo Pīterdīna Rogovkā nūtyka 2004. goda 29. junī, sasadorbojūt ar Lauku biblioteku atbolsta fondu i kinorežisoru Juoni Streiču, i aptvēre na tikai Latgolu, bet arī cytus Latvejis nūvodus. Tī beja svātki, kurūs ar dzejis lasejumim pīsadaleja īvārojami latvīšu dzejnīki.
Itūgod konkursa moto ir Pītera Jurceņa vuordi:
"Var tymsā pakrist redzeigais, bet naredzeigais - gaismā puortapt"
Konkursā var pīsadaleit sevkurs, kas ir pīrakstejs nūlykumam atbylstūšu, vēļ napublicātu dorbu latgalīšu volūdā. Dorbi tiks vierteiti pīcuos nominacejuos: dzeja, proza, skečs voi vīncielīņs, bārnu literatura i latgaliskūs vierteibu paruodeišona sevkura dailliteraturys žanra dorbā. Konkursam dorbi juoatsyuta leidz 22. juņam (īskaitūt) pa postu (“Pagastmāja”, Rogovka, Nautrēnu pagasts, Rēzeknes novads, LV-4652, ar nūruodi “Literatu konkursam”) voi elektroniski (iz e-postu: inga.vigule@rezeknesnovads.lv ), nūruodūt autora vuordu, uzvuordu, telefona numeri, adresu, nūsadorbuošonu.
Konkursa laureatu apbolvuošona nūtiks 2022. goda 29. juņa pasuokumā “Pīterdīna Rogovkā” Rēzeknis nūvoda Nautrānu pogostā. Kotrys nominacejis laureats sajims naudys premeju 100 (vīns symts) EUR apmārā, kai arī byus specbolva nu Latgalīšu volūdys, literaturys i kulturviesturis školuotuoju asociacejis (LVLKŠA) par bārnu prozu latgalīšu volūdā.
Seikuoka informaceja nūlykumā:
Inga Vigule, Nautrānu pogosta kulturys pasuokumu organizatore