Lūznovys muižā nūtiks Turisma forums
Latgalīšu kulturys bīdreiba (LKB) sadarbeibā ar Rēzeknis nūvoda pošvaļdeibu organizej Turisma forumu latgalīšu kūpīnys lidereibys i pīdereibys styprynuošonai, kas nūtiks 2. junī Lūznovys muižā, informej organizatoru puorstuove Santa Rudze. Pyrmuo sasatikšona ar turisma nūzaris ekspertim byus jau 26. aprelī tīšsaistē. Pasuokumus interesenti varēs apmeklēt bez moksys.
Pasuokumūs tiks aicynuoti Latgolys regiona, nacionala i storptautyska mārūga turisma eksperti, kuri teikluošonuos formatā diskutēs par aktualitatem i daleisīs ar sovim pīredzis stuostim. Itaids formats ļaus sevkuram dalinīkam dabuot napīcīšamuos zynuošonys i īmanis, kab nūdrūsynuotu sova pakolpuojuma ci produkta atteisteibu.
26. aprelī nūtiks tīšsaistis ekspertu īpasazeišonys pasuokums. Tymā eksperti prezentēs turisma jūmys atteisteibys tendencis pasaulī i Latvejā, stuosteis par nūzaris vareibom sarežgeitajā geopolitiskajā i ekonomiskajā situacejā, runuos par teiklošonuos nūzeimi ari papildfinansiejuma dabuošonai. Tīšsaistē tū varēs vērtīs latgolyskongress.lv.
2. junī 11.00 stuņdēs suoksīs kluotīnis pasuokums Lūznovys muižā, kur foruma dalinīki diskutēs par praktiskys dobys vaicuojumim ar jūmys ekspertim, kai ari meklēs rysynuojumus turisma jūmys atteisteibai sovā regionā. Programa i pīsasaceišonys veidlopa byus atrūnama Latgalīšu kulturys bīdreibys Facebook lopā tyvuokajā laikā.
2023. godā teik plānuoti diveji kluotīnis i pīci tīšsaistis pasuokumi par vysaidim Latgolys kongresa rezolucejis tematim: izgleiteiba, uzjiemiejdarbeibys atteisteiba, drūšeiba. Sevkurā pasuokumā pīsadaleis attīceiguos jūmys puorstuovi Latgolys regionā. Kab veicynuotu teikluošonūs i sadarbeibys veiduošonu, forumā teik aicynuoti konkretuo nūvoda aktīvuokī izgleiteibys, kulturys īstuožu, NVO puorstuovi. Projekts teik eistynuots, realizejūt Latgolys kongresa rezoluceju, izgleitojūt sabīdreibu piļsūniskuos leidzdaleibys vaicuojumūs i uzturūt kūddarbeibys aktivitatis vysaidu nūzaru grupuos.
Pasuokumu organizej: Latgalīšu kulturys bīdreiba, Rēzeknis nūvoda pošvaļdeiba i Latgolys kongresa lāmumu izpiļdis padūme. Projektu ”Latgalīšu kūpīnys lidereibys i pīdereibys styprynuošona, eistynojūt Latgolys kongresa idejis” finansiali atbolsta Sabīdreibys integracejis fonds nu Kulturys ministrejis pīškiertūs Latvejis vaļsts budžeta leidzekļu. Projekts teik realizāts nu 03.04.2022. da 31.10.2024.