Latgalīšu jaunīšus aicynoj "Atzolys"

Bīdreiba "Latgolys Studentu centrs" itymā vosorā otkon aicynoj pīsadaleit jaunīšus vosorys naformalajuos apvuiceibuos "Atzolys". Naformaluos apvuiceibys nūtiks Rēzeknis nūvoda Bieržgaļs pogostā nu 10. da 13. juļam. Aicynuoti pīsadaleit jaunīši nu 17 da 22 godu vacumam.
Apvuiceibuos byus īspieja īsavuiceit raksteit latgaliski, uzzynuot viesturis i kulturys faktus, sasatikt ar Latgolys kulturys cylvākim, muzykantim, literatim. Tradicionali "Atzolys" paleidz apsazynuot jaunīšim Latgolys sovpateibu, īvuica byut lapnim par sovom saknem i pīdereibu i veicynoj jaunuos paaudzis interesi par Latgolu i latgaliskū. Golvonuo “Atzolu” vierteiba ir stypruos tradicejis, kurys teik saglobuotys jau godim i natiks pīmierstys ari itūgod.
Dasacejuma anketu i seikuoku info var meklēt bīdreibys sātys lopā www.lgsc.lv ci LaKuGa.lv.
Inguna Semule